ફાઇનાન્સિયલ ટેકનોલોજીસ દ્વારા પ્રમોટ કરવામાં આવેલી નેશનલ બલ્ક હેન્ડલિંગ કોર્પોરેશન લિ. (એનબીએચસી) એ ભારતમાં વિવિધ સ્થળે લીઝ અને ફ્રેન્ચાઈસી આધારિત સ્ટોરેજ સુવિધાઓ (વેરહાઉસ અને કોલ્ડ સ્ટોરેજ)નું સંચાલન કરે છે. 18 રાજ્યોમાં ફેલાયેલી આવી 333 સુવિધાઓની કુલ સ્ટોરેજ ક્ષમતા 1.30 મિલિયન મેટ્રિક ટન છે. કોમોડિટી પરિતંત્રને બૅન્ક પાસેથી ધિરાણ મળી રહે તે માટે એનબીએચસી આ તમામ વેરહાઉસોને બૅન્કો અને નાણાકીય સંસ્થાઓ માટે સાંકળે છે. એકસૂત્રી આયોજન હેઠળ એનબીએચસી 3000 કરતાં વધુ સ્ટોરેજ સુવિધાઓમાં 40 લાખ મેટ્રિક ટન સ્ટોકનું સંચાલન કરે છે, જેનું મૂલ્ય 1.25 અબજ અમેરિકન ડૉલર કરતાં વધુ થાય છે. એનબીએચસી તમામ સંબંધિત જોખમોની સામે કોમોડિટીનું જતન કરે છે અને ધિરાણકર્તા તથા ઋણ લેનાર બંનેને ગુણવત્તા અને જથ્થાની બાંયધરી આપે છે. એનબીએચસી વેરહાઉસિંગ અને બલ્ક હેન્ડલિંગ, ગ્રેડિંગ અને ઈન્સ્પેક્શન, કોમોડિટી કેર અને પેસ્ટ મૅનેજમેન્ટ, કોલેટરલ મૅનેજમેન્ટ, કોમોડિટીની ખરીદી અને વેચાણ, વેરહાઉસ ઑડિટ અને એક્રેડિટેશન તથા કોમોડિટીના મૂલ્યાંકન માટે સર્વગ્રાહી સોલ્યુશન્સ પૂરાં પાડે છે. વચેટિયાઓ નાબૂદ કરવામાં અને કાપણી પછી સરળ નાણાકીય ભંડોળ ઉપલબ્ધ કરાવવામાં એનબીએચસી નાના અને મધ્યમ ખેડૂતોને મદદરૂપ થાય છે. એનબીએચસીએ એક્સિસ બૅન્ક, બૅન્ક ઑફ ઈન્ડિયા, એચડીએફસી બૅન્ક, આઈડીબીઆઈ, કોટક મહિન્દ્રા બૅન્ક અને એસબીઆઈ સહિત જાહેર અને ખાનગી ક્ષેત્રની 23 અગ્રણી બૅન્કો સાથે પેનલ બનાવી છે. તેના કૉર્પોરેટ ગ્રાહકોની યાદીમાં આઈટીસી લિ., નાફેડ, કારગિલ ઈન્ડિયા, ઑસ્ટ્રેલિયન વ્હીટ બોર્ડ, ગ્લેનકોર ઈન્ટરનેશનલ અને લુઈસ ડ્રેફસનો સમાવેશ થાય છે.

ફાઈનાન્સિયલ ટેક્નોલોજીસ (ઈન્ડિયા) લિમિટેડે સીએમએસએલની સ્થાપના કરી છે. બૅન્કિંગ અને નાણાકીય સેવા ક્ષેત્રનો વિશાળ અનુભવ ધરાવતા વ્યવસાયીઓ - શ્રી ડી. રવિશંકર અને શ્રી એન. બાલસુબ્રહ્મણ્યન તેના સ્થાપક ડિરેક્ટરપદે છે. એફટી ગ્રુપ ઇક્વિટી, કોમોડિટી, કરન્સી અને ડેબ્ટ સહિતની તમામ પ્રકારની અસ્કયામતોમાં તંત્રજ્ઞાનનાં સોલ્યુશન્સ પૂરાં પાડતું તથા નાણાકીય બજારોમાં નિપૂણતા ધરાવતું વૈશ્વિક અગ્રણી ગ્રુપ છે. ભારતમાં હાલ ધિરાણ બજારમાં પ્રવાહિતા ઘણી ઓછી છે. તેનો વિકાસ કરવા માટે સલાહકારી સેવાઓ, ખાસ પ્રમાણપત્ર અભ્યાસક્રમો તથા ક્રેડિટ બજારના વ્યવસાયીઓ અને ક્રેડિટ બજાર સુધી પહોંચવા માટેનું માધ્યમ એ બધી આવશ્યક્તાઓ સંતોષીને ભારતમાં તે કામ કરનારી અગ્રણી કંપની બનવાનો તેનો ઉદ્દેશ છે. આ ઉદ્દેશની પૂર્તિ કરવા માટે સીએમએસએલે ધિરાણ બજારને લગતી એકેડેમી, નાણા વિભાગ અને ધિરાણ બજારો માટેની વૈશ્વિક સંસ્થા તથા ધિરાણસંબંધી આકલન માટેનું કેન્દ્ર સ્થાપવાની દિશામાં કામ શરૂ કર્યું છે.

એટમ ટેકનોલોજીસ લિ. (એટમ) એ ફાઇનાન્સિયલ ટેકનોલોજીસ ગ્રુપની ડિજિટલ રિટેલ પહેલ છે. એટમ એ પેમેન્ટના પ્રોસેસિંગ માટેની આધુનિક સિસ્ટમ છે, જેના આધારે મોબાઈલ મારફતે કોઈપણ સોદાવ્યવહાર થઈ શકે. ફોનના ઉપયોગ દ્વારા આ સોદાવ્યવહાર પેમેન્ટ માટેના બૅન્કના માધ્યમ મારફતે થતા હોય છે. એટમ ઈન્ટરેક્ટિવ વૉઈસ રિસ્પોન્સ (આઈવીઆર) ટેકનોલોજીનો ઉપયોગ કરે છે, જેને પરિણામે કોઈપણ માનવીય દખલગીરી નાબૂદ થાય છે અને નાણાકીય વ્યવહારો સંપૂર્ણપણે સલામત બને છે. મોબાઇલના હેન્ડસેટની મદદથી થતા નવીનતાસભર કાર્યો મારફતે બિઝનેસ અને સામાન્ય જનતા વચ્ચેનું અંતર ઘટાડવા માટેનું એટમનું મુખ્ય કાર્ય છે. આમ, યોગ્ય પહોંચ, સલામતી અને સરળતા સાથે કરી શકાય એવા સોદાવ્યવહારો તે કરાવે છે. એટમનાં પ્રોડક્ટ્સથી ક્રેડિટ કાર્ડ દ્વારા ચૂકવણી, ટિકિટ બૂકિંગ તથા શોપિંગ સલામત રીતે કરી શકાય છે. ‘એટમ સેવા’ દ્વારા એટમનો હેતુ બૅન્કિંગ, લોન અને વીમા જેવી એજન્ટ આધારિત ડોર-ટુ-ડોર માઈક્રો બૅન્કિંગની સુવિધા આપીને નાણાકીય વ્યવહારોનો વ્યાપ વિસ્તારવાનો છે.

ટિકરપ્લાન્ટ લિમિટેડ એ ભારતની ઊભરી રહેલી વૈશ્વિક કન્ટેન્ટ પ્રોવાઈડર સંસ્થા છે. તે માર્કેટ ડેટા એકત્ર કરે છે અને તત્કાળ તેનું વિતરણ કરે છે જેથી સાચો નિર્ણય લેવામાં મદદ મળે. ટિકરપ્લાન્ટ મધ્યમ કદનાં બજારોને સ્પર્ધાત્મક ભાવે પ્રાઈસ પર્ફોર્મન્સ સેવાઓ પણ આપે છે. ટિકરપ્લાન્ટની રચના એ રીતે કરવામાં આવી છે જેથી કોઈપણ વ્યવસાય માટે જરૂરી ચોક્કસ પ્રકારની માહિતી મળી શકે. આ સોલ્યુશન્સ ગ્રાહકની જરૂરિયાતને પહોંચી વળવા માટે તત્કાળ સારી લાક્ષણિકતાઓ અને ઉપયોગિતા પૂરી પાડે છે. ઓપન ટેકનોલોજી ધોરણોનો ઉપયોગ કરીને ટિકરપ્લાન્ટ તેના વપરાશકર્તાઓને ઉચ્ચ સલામતી પૂરી પાડવા સાથે મહત્તમ લવચીકતા ઑફર કરે છે. જે કન્ટેન્ટ (નાણાકીય અને બિન-નાણાકીય) તૈયાર કરવામાં આવ્યું હોય અને એકત્ર કરવામાં આવ્યું હોય તેમાં ટિકરપ્લાન્ટ અસાધારણ મૂલ્યનો વધારો કરે છે. તે ઉપરાંત ટિકરપ્લાન્ટ બજારની જરૂરિયાતો અનુસાર કન્ટેન્ટની ઉપયોગિતા વધારે છે, કન્ટેન્ટનો વ્યાપ વિસ્તારે છે. ટિકરપ્લાન્ટનાં સોલ્યુશન્સથી તમામ ચાવીરુપ ક્ષેત્રોમાં નાણાકીય માહિતી અને ગુણવત્તાસભર કન્ટેન્ટનું એક ધોરણ (બેન્ચમાર્ક) પ્રસ્થાપિત થયું છે.

એફટી નોલેજ મેનેજમેન્ટ કંપની (એફટીકેએમસી) એ ફાઇનાન્સિયલ ટેકનોલોજીસ ગ્રુપનું જ્ઞાનકેન્દ્ર છે. એફટીકેએમસીનાં મૂળ એક સમયના મલ્ટી કોમોડિટી એક્સચેન્જ (એમસીએક્સ) ઑફ ઈન્ડિયા લિ.ના એમસીએક્સ સેન્ટર ઑફ એકેડેમિયા – કન્સલ્ટન્સી એન્ડ ટ્રેનિંગ વિભાગમાં રહેલાં છે. એફટીકેએમસી ટૂંકા અને લાંબા ગાળાના તાલીમ કાર્યક્રમો ઑફર કરે છે અને કન્સલ્ટન્સી સેવાઓ પણ આપે છે. આ કાર્યક્રમોનો હેતુ ફાઇનાન્સિયલ ટેકનોલોજી ગ્રુપ પાસેની જાણકારી અને વિશેષ કુશળતાનો ઉપયોગ કરીને નાણાકીય બજારો માટે ગુણવત્તાસભર શિક્ષણ આપવાનો અને નાણાકીય બજારોના નિષ્ણાતો તૈયાર કરવાનો છે. એફટીકેએમસી મહિન્દ્રા એન્ડ મહિન્દ્રા, બજાજ ઈલેક્ટ્રિકલ્સ અને એચસીએલ ટેકનોલોજીસ સહિતના ગ્રાહકોને તેમની આવશ્યક્તા મુજબની કન્સલ્ટન્સી ઑફર કરે છે. એફટીકેએમસી દ્વારા હાથ ધરવામાં આવેલાં કેટલાંક મુખ્ય એસાઈનમેન્ટમાં કંપનીઓ માટે રિસ્ક મૅનેજમેન્ટ સોલ્યુશન્સ, ટ્રેડિંગ અને હેજિંગ માટે કોમોડિટી ડેસ્કની રચના, એમસીએક્સના સભ્યો માટે રિસ્ક મૅનેજમેન્ટ કન્સલ્ટન્સી સોલ્યુશન તથા કોમોડિટી અને અન્ય નાણાકીય પ્રવૃત્તિઓ માટે વેલ્યુએશન મોડેલની રચના કરવાનો સમાવેશ થાય છે.

એમસીએક્સ-એસએક્સ ક્લીયરિંગ કોર્પોરેશન લિમિટેડ (એમસીએક્સ-એસએક્સ સીસીએલ) એ એમસીએક્સ સ્ટોક એક્સચેન્જ લિમિટેડ (એમસીએક્સ-એસએક્સ)નું ક્લીયરિંગ કોર્પોરેશન છે. એમસીએક્સ સ્ટોક એક્સચેન્જ લિમિટેડ (એમસીએક્સ-એસએક્સ), મલ્ટી કોમોડિટી એક્સચેન્જ ઓફ ઈન્ડિયા લિમિટેડ (એમસીએક્સ) અને ફાઈનાન્સિયલ ટેક્નોલોજીસ ઈન્ડિયા લિમિટેડ (એફટીઆઈએલ)ના સંયુક્ત ઉપક્રમે તેની સ્થાપના કરવામાં આવી છે. એમસીએક્સ-એસએક્સ માન્યતાપ્રાપ્ત સ્ટોક એક્સચેન્જ છે. તેને ચલણનાં ડેરિવેટિવ્ઝમાં ટ્રેડિંગ કરવાની પરવાનગી મળેલી છે. એમસીએક્સ-એસએક્સ સીસીએલ શરૂઆતમાં એમસીએક્સ-એસએક્સના કરન્સી ડેરિવેટિવ્ઝ વિભાગમાં થયેલા સોદાઓનું ક્લીયરિંગ અને પતાવટ કરશે એમસીએક્સ-એસએક્સ આઠ ક્લીયરિંગ બૅન્ક સાથે સંકળાયેલું છે અને તે આ તમામ આઠ બૅન્કને તથા ભવિષ્યમાં બીજી વધારેને પોતાની યાદીમાં સમાવી લેશે જેથી ટ્રેડિંગ મેમ્બરો/ક્લીયરિંગ મેમ્બરોને બૅન્કિંગની સેવાઓ પૂરી પાડી શકાય. એમસીએક્સ-એસએક્સ સાથે બૅન્કોને સાંકળી લેવાઇ છે તથા હવે એમસીએક્સ-એસએક્સ સીસીએલ બૅન્કો તથા ડિપોઝિટરીઝ સાથેના સંબંધનો ઉપયોગ કરીને ઇલેક્ટ્રોનિકસ પતાવટની સુવિધા આપશે. એક્સચેન્જનું કામકાજ ક્લીયરિંગ કોર્પોરેશનને હવાલે કરીને આ પ્રમાણે કરવામાં આવશે. એમસીએક્સ-એસએક્સ સીસીએલ એમસીએક્સ-એસએક્સની પતાવટની તમામ જવાબદારીઓ માટે કાઉન્ટર પાર્ટી બનશે તથા પતાવટની બાંયધરી આપશે. એમસીએક્સ-એસએક્સ સીસીએલના ક્લીયરિંગ મેમ્બર પોતાના ટ્રેડિંગ મેમ્બરોએ એમસીએક્સ-એસએક્સ પર કરેલા સોદાઓનું ક્લીયરિંગ તથા પતાવટ કરવાની જવાબદારી નિભાવશે.

રિસ્ક્રાફ્ટ કન્સલ્ટિંગ લિ. (રિસ્ક્રાફ્ટ) એ વિશેષ કૌશલ્યને સંબંધિત ક્ષેત્રની ફાઈનાન્સિયલ ટેક્નોલોજીસ ગ્રુપની પહેલ છે. બૅન્કિંગ તથા ફાઈનાન્સિયલ સર્વિસીસ ઇન્ડસ્ટ્રી (બીએફએસઆઈ)ને નાણાકીય જોખમોનું સંચાલન, જોખમોનું વિશ્લેષણ, ક્વોન્ટિટેટિવ ટેક્નિક તથા જોખમ સંચાલન માટેનું માહિતી ભંડોળ જેવી સેવાઓ પૂરી પાડવા પર તેણે ધ્યાન કેન્દ્રીત કર્યું છે. જોખમને લગતી દેખરેખ માટેનું રિસ્ક્રાફ્ટનું તંત્રજ્ઞાન વિદેશના નિયામકે સફળતાપૂર્વક અમલમાં મૂક્યું છે. ભારતના એક નિયામકે પોતાના આંતરિક ઉપયોગ અર્થે ક્વોન્ટિટેટિવ મોડેલ વિકસાવવા માટે રિસ્ક્રાફ્ટની સેવાઓ લેવાનું ચાલુ રાખ્યું છે.